वेळास्ते ग्रामपंचायत

ग्रुप ग्राम पंचायत वेळास्ते, तालुका मुरुड-जंजिरा, जिल्हा रायगड (पिन ४०२४०१) अंतर्गत एक महत्त्वाचे ग्रामीण स्वराज्य केंद्र आहे. वेळास्ते हे या समूह ग्रामपंचायतीचे मुख्य गाव असून वांद्रेवाडी आणि वावे (वावे आदिवासीवाडी सहित) ही गावे यामध्ये समाविष्ट आहेत. ही ग्रामपंचायत रायगड जिल्हा परिषद व मुरुड पंचायत समितीच्या अखत्यारीत कार्यरत आहे. गावाची सद्य लोकसंख्या १३१२ असून गावातील बहुतांश लोकसंख्या शेतीप्रधान आहे. संपूर्ण ग्रामपंचायत क्षेत्रात १००% कर वसूली होते. "प्रत्येक शेतकरी लखपती शेतकरी" ही ग्रामपंचायतीची चालू मोहीम आहे. पाणीपुरवठ्यासाठी "हर घर जल - हर घर नल" योजनेंतर्गत जवळपास सर्व कुटुंबांना स्वतंत्र नळ जोडणी देण्यात आलेली आहे.

गाव नैसर्गिकरित्या सह्याद्रीच्या टेकड्यांच्या सान्निध्यात वसलेले असल्याने पावसाळ्यात परिसर हिरवागार दिसतो आणि अनेक लहान-मोठे धबधबे अनुभवता येतात. गावात धाविर महाराज व करजाई देवी यांची मंदिरे आहेत, जी स्थानिकांची श्रद्धास्थाने आहेत. शिक्षणाच्या दृष्टीने वेळास्ते, वावे आणि वांद्रेवाडी येथे जिल्हा परिषद प्राथमिक शाळा आहेत. तीन अंगणवाडी केंद्रे कार्यरत आहेत. आरोग्य उपकेंद्र गावात नसले तरी नांदगाव येथे सुमारे ६ किमी अंतरावर सुविधा उपलब्ध आहे.